صباح الخير ، كيف حالك؟ وكيف حالي أنا؟ ما عندي تصوّر واضح لذلك قررت اكتب رسالة أسرد فيها أفكاري، كوني لي يومين مرافقة مع أحد أفراد العائلة بالمستشفى، وكان يشغل بالي نشرة الأسبوع، وبالطبع بيكون فيه صوت جلّاد ناقم يقول "ماقلت لك جدولي النشرات بدري احتياط" وأنا اسمعه كل مره وأقوله استريح المشاريع الناجحة خلفها شخصيات حقيقية، ولا يتعارض هذا مع الاحترافية، لكن لا يعني أنك فاشلة إذا ما كنتي مخططة ومرتبة لكل شي بالمللي!

أكتب لك هذه النشرة باللهجة البيضاء، من كرسي المستشفى الغير مريح، ولأول مره بتوصلك النشرة كمسودة بدون تعديل، فما عندي الطاقة لمحاولة ترتيب وصياغة وتدقيق كل شيء، تخيلي تقرينها بصوت إنسانة تعرفينها ولا مانع أنك تحبينها بعد😉 عشان تستمتعين فيها.

⟵ المشاريع الحقيقة

في الفترة الأخيرة لاحظت حولي صديقات عزيزات يجاوبون على وضعهم بالشغل أنه " اشتغل عليه بهدوء مره" وكنت أفكر لأول مره أن هذا الهدوء هو سمة للأشخاص اللي تكون مشاريعهم تحمل توجّه ورسالة عميقة جايه من داخلهم، وكأن الموضوع يحتاج ياخذ وقته "يتخمّر" ويكون جزء من حياتنا بدل ما نكرّس له وقت لوحده، على حساب أشياء كثير بحياتنا! هل صحيح؟ لو تعرفيني بتعرفين أني ما احب كلمة صح وخطأ بالعمل، فيه مناسب وغير مناسب.. لو كانت عندك سرعة ونار تبي تطبخ الشغل بسرعة، استغليها.. لكن لو تحتاجين لوقت، بقولك خذي كل الوقت 🤍.

⟵ مطبات الحياة

دايم كنت اشوف مطبات الحياة ضياع للوقت وخسارة للجهد، سواء كان النقل المفاجئ، المرض، زيارة ماحسبنا لها، أي شي غير مخطط له وغير مريح بالوقت نفسه. إلى ما استوعبت أن كل شيء بدون استثناء له معنى وقيمة ودرس، حتى لو كان فراغ .. دايم نقول الصفر ماله قيمة، بس لو حطيناه كذا 3029 بيحفظ مكانة تساعدنا نقرأ العدد! ونفس الشي الفراغ بالحياة.

⟵ مساحة بين الفعل وردة الفعل

أحب تعريف الوعي لـ نور عزوني يقول "الوعي هو المسافة بين الفعل وردة الفعل" حصلت لي اخر ٣ شهور مواقف ولاحظت أني اكون وكأني انفصلت عني من مكان أبعد، واشوف تصرفاتي مع أحكامي عليها لكن بدون أخذ ردة فعل سواء كان لمحاولة تصليحها أو حتى الهروب منها.. لاحظت يعطيني كمية تعاطف وحضور مع الحدث وعبور للمشاعر اللي تصاحبه.

⟵ ختام ~

شكراً لك لأن قريتي ووصلتي إلى هنا، عندي صوت يقول احذفي وبلاش من هالرسالة لكن دايم أعرف أنها ما طرت على بالي إلا أن فيه وحدة بتقرأها وبتفرق معها بشيء، عني أنا بعد ما أرسل الرسالة بتمدد لليوم الثاني على الكرسي المزعج وأتابع مسلسل يقل مستوى وعيي فيه مع كل حلقة، أتمنى لك ويكند سعيد هادي رايق 💗.

🫂 الصورة بداية الايميل من قلب الحدث، بس الأمور تمام وشكراً لسؤالك اللي بداخلك 🫂

كل الحب

 مديحة

الجمعة، 21 فبراير 2025